Тропарь, кондак и молитва священномученику Зосиме Крылатскому. Составлены настоятелем храма. Для келейного употребления, до утверждения священноначалием.
ТРОПА́РЬ, глас 4:
От ю́ности в пусты́нях Бо́га взыска́вый,/ и в нищете́ Христу́ порабо́тавый,/ па́стырь и́стинный во дни гоне́ний яви́лся еси́./ До́брый де́латель виногра́да Христо́ва бы́в,/ во у́зах и заточе́ниих тве́рдо испове́дал еси́ ве́ру,/ и в Караганди́нстей земли́ му́ченически сконча́лся еси́./ Святы́й священному́чениче Зоси́мо,/ моли́ Христа́ Бо́га// спасти́ся душа́м на́шим.
КОНДА́К, глас 3:
В земли́ Вя́тстей возсия́вый,/ и во хра́ме Богома́тере Крыла́тстем па́стве ве́рно послужи́вый,/ треми́ у́зами я́ко венцы́ украси́вся,/ страда́нием и кро́вию Це́рковь Ру́сскую возвели́чил еси́./ Ны́не же в Небе́сней сла́ве пребыва́я,/ предстои́ши Престо́лу Царя́ Сла́вы,/ моля́ся о чту́щих па́мять твою́,// священному́чениче Зоси́мо.
Моли́тва священному́ченику Зоси́ме Крыла́тскому:
О, пречу́дный страстоте́рпче и священному́чениче Зоси́мо! От ю́ности твоея́ Го́спода возлюби́в, в пусты́нных ме́стех моли́твеннаго ра́ди де́лания уединя́лся еси́, в нищете́ и смире́нии Христу́ угожда́я. Те́мже яви́лся еси́ па́стырь до́брый ста́да Христо́ва, и с ве́рными ча́ды твои́ми в годи́ну гоне́ний го́рьких ско́рби претерпе́в, в лю́тых испыта́ниих до́брое испове́дание пред мучи́тели дерзнове́нно яви́л еси́.
Ны́не же, у престо́ла Бо́жия со святы́ми новому́ченики Це́ркве Ру́сския предстоя́, моли́ся о нас, недосто́йных, чту́щих святу́ю па́мять твою́, да сохрани́т Госпо́дь Це́рковь Ру́сскую в ми́ре глубо́це, да пода́ст па́стырем на́шим му́жество и кре́пость, до́брое о па́стве попече́ние, и все́м правосла́вным христиа́ном ве́ры утвержде́ние, любве́ умноже́ние, наде́жду спасе́ния и терпе́ние в ско́рбех. Утеши печа́льныя, теплый предстателю наш, заступи́ оби́димыя, укрепи́ малоду́шныя, наста́ви заблу́ждшия на путь и́стины.
Еще́ же мо́лим тя, святы́й уго́дниче Бо́жий, о е́же сохрани́ти нам ве́рность Христу́ да́же до сме́рти, я́коже ты сохрани́л еси́, и сподо́би ны моли́твами твои́ми Ца́рствия Небе́снаго, иде́же ты ны́не со все́ми святы́ми весели́шися, сла́вя Пресвяту́ю Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.